noonem Motto: immer alles im Schuss!


Damit an dr Fasnacht s Spiil und dr Vordraab dostoht wie us aim Guss, bruchts ebbis an Vorarbete. Do unseri Gugge in traditionelle Basler Goschdym laufe tuet, sinn die bi uns weniger sträng als in Glyggen und Gugge, wo jedes Joor e Süüschee uusgspiilt wird.

Dr erscht Termin, kurz no dr Fasnacht, je nach Plaanig sogar scho vorhär, träffe mir uns im Mohreloch, zem festlege, welles Goschdym mir im folgende Joor wärde ha. Denn ka d Süüscheekommission aafange schaffe, erschti Entwirf gschtalte und beraits mit dr Schnyydere und em Larvemacher Kontaggt uffnäh und Prototype lo aafertige.

Parallel derzue isch d Musigkommission am schaffe, erarbeitet neyi Stiggli, suecht Noote zämme, iebt an den Stiggli, tuet bestehendi Stiggli nochschaffe und eventuell us em Archiv Alts ney aarysse.

Aber au dr Räschte vom Spiil ligt nid uff dr fuule Huut, nai, brobe tuet me schliesslig s ganze Joor. No dr Fasnacht bis zue de Summerferie, wird ai- bis zwaimool im Moonet, was d Muusigkommission ibere bringt, umgsetzt und bestehendi Stiggli immer wieder gspiilt, ass me fir Ständeli jederzyt ùff dr Hechi isch. No de Summerferie sind denn wichentlich Brobe aagsait, jede Donnschtig im Mohreloch.

Derzwische wird an Aggtivesitzige beschlosse, wie s Goschdym, uff Grund vo de Prototype sott ussseh, was fir neyi Stiggli ins Repertoire kemme und welli ass me will im Archiv loh verschwinde. Es wird au wiescht driber dischbediert, wo und wie ass me näggscht Joor an d'Vorfasnacht goht, welli Aaläss an welle Date sotte statt finde, wäär dr Fasnachts- und dr Herrebummel organisiere darf oder muess. D Källergruppe mien allefalls nei uffteilt, neyi Mitgliider integriert wärde.

Dernäbe wärde Feschtli und Aaläss vorbereitet, iber Ständeli abgstumme, d Date vom Brobewucheänd und vom Probesamschtig feschtgnaglet.

Und damit sich d Mohrekopf-Familie nit us de Auge verliert, finde Aaläss wie s Fondueässe statt. Au s Depotfescht, wo mir, wenn immer meeglig, jede Jänner dure fiere, soll derzue bydraage, ass dr Zämmehalt innerhalb vo dr Gugge do isch und dr Kontaggt zer ibrige Fasnachtsszene statt finde ka.

Und denn lauft scho wieder unerbittlig dr Wegger ùff d Fasnacht! Goschdym- und d Larveuusgob lytte dr Ändspurt y. Marschbrob und Vorfasnacht stehn a. D Mohrelochete, e traditionelle Schnitzelbanggaalass im Mohreloch, lauft iber d'Bihni und jetz waiss dr Hinderscht und dr Letscht, am näggschte Mäntig fange die drey scheenschte Dääg vom Joor ändlig wieder aa!